O Samoa le tasi o atunuu o le Pasefika o le a afea i le asiasiga a le failautusi aoao o Malo Aufaatasi le susuga Antonio Guterres, lea ua faamoemoe e 3 aso o le asiasiga e amata i le Aso Lulu o le vaiaso nei.
O le a feiloa’i atu le failautusi aoao i le ta’ita’i o le malo le afioga i le tamaitai Palemia.
O le a ia asia afioaga na sili ona ogaoga aafiaga mai le galulolo poo le sunami ia Setema o le tausaga e 2009, lea o le a molimauina ai e Antonio Guterres le toe faaleleia o ia afioaga i le tuanai o lea mala faalenatura.
O se tasi o vaega o lana asiasiga o le auai lea i le sauniga o le a tuuina atu aloa’ia ai le maota i Tuanaimato ua ofaga uma iai nisi o auaunaga a Malo Aufaatasi i Samoa le One UN House, o se aseta poo se meatotino a le Malo o Samoa.
O se tasi o vaega tāua o lana asiasiga o le molimauina o le malosi o tu ma aganuu a Samoa e pei ona faamautū i le galulue faatasi o nuu ma afioaga e lagolagoina polokalame o suiga tetele o le tau.
O le tausaga e 2014 na ulua’i afea ai Samoa e se failautusi aoao o Malo Aufaatasi o ia lea o Ban Ki Moon, a o usuia i Samoa i lena tausaga le fono a Malo laiti tauatia’e o le lalolagi poo le Small Island Developing States.
