Ua faanofoesea i le nofoaga faapitoa i le maota gasegase i Motootua se alii talavou 24 tausaga le matua, o ia o se tasi o le pasese 134 lea na malaga mai Fiti ma na taunuu atu i Samoa i le Aso Tofi o le vaiaso na tea nei ona ua nofo ai nei le siama o le faama’i Koviti19.
O le tuanai o aso e tolu talu ona tuanuu na faia ai lana suega poo le test ae maua ai ua aafia i le vairusi o le faama’i. Na faia le suega mo pasese uma na malaga faatasi ma lea tuale’ale’a ina ua taunuu e le’o aafia i le vairusi ma ua maea ona tui e lua o le faama’i ona malaga atu ai lea i Samoa.
I le fono a Tusitala ma le Komiti o Faalavelave Faafuasei i le amataga o le vaiaso na faailoa ai e le Faatonu Sili o le Soifua Maloloina ia Leausa Dr. Take Naseri e leai ma ni foliga ma’i o le taule’ale’a, o loo manuia.
“O le tulaga lea ua iai e le’o iai se faapopole vaveina ai, o loo malosi pea e leai ni auga, ma o la foi e fealuai a ia ua uma ona fai ona tui puipui, pau le mea lea ua aumai totonu e isolate ese mai isi tagata ma vaavaai ai, o le tulaga lena o loo iai ae o loo manuia pasese uma, o le isi 133 o loo manuia uma i latou o lea a e faagasolo le faiga test e pei ona o’u talanoa atu o lea ua sailiili tagata ia na latou nonofo faatasi mai le vaalele ma a iai foi se mea e alia’e mai ona isolate foi lea ae ese se mea e isolate ai”.
Na faaopoopo le faaululuga o le Komiti Faalavelave Faafuasei Agafili Shem Leo ma faapea “O le tasi foi la lea tāua tele i le faafofoga mai a si o tatou atunuu, o i latou uma o loo malaga mai o le ala lea o le taumafai atu o le tatou komiti ina ia usitaia a tatou health requirements o loo mafai ai ona agai i Samoa. O le isi la health requirements autū lava o le ma’ea ona faia uma o ou tui puipui e lua.”
E toa 20 isi tagata o le pasese o i latou na latalata i le nofoa na nofo ai le taule’ale’a faapea foi nisi na o latou faamautu i le nofoaga na faanofoesea ai o lea ua mataitū le Matagaluega o le Soifua Maloloina ma e aveesea foi i nofoaga e faanofoesea ai pe a masalomia ua aafia i le faama’i.
O le taule’ale’a ua masalomia le aafia i le koviti19 e faapea e faamautu i Hawaii ma na malaga i Los Angeles i Amerika pu’e ai lana vaalele e malaga ane ai i Fiti ona maua ai lea o le isi vaa e malaga atu ai i le atunuu.
