isolation

Aafia o sui faasalalau o le Radio Samoa i le Covid-19

E toalua sui faasalalau a le Leitio a le Radio Samoa 1593AM i Aukilani ua faamaonia le aafia i āuga o le faama’i o loo pipisi nei, le Koviti 19 i le ituaiga o le Delta Variant.

O Tavai Meni ma Failautusi Tiatia o fofoga o polokalame a le Radio Samoa e pei o le Malū o le Taeao, ma le polokalame o le Fiafia Mai i le aoauli.

Na faalauiloaina i le polokalame i le aoauli nei, i se faatalatalanoa ma le susuga ia Tavai i luga o le polokalame a le leitio, na ia faailoa mai ai le tulaga ua iai nei a’o faanofoesea i lalo o le vaavaaiga a le Matagaluega o le Soifua Maloloina.

E le gata i lea, e toatele nisi o le aufaigaluega ua faanofoesea mo le 14 aso ona o latou o close contacts poo e sa fesoota’i vavā lalata ma i la’ua ua aafia.

Na ta’ua e le Pulega o le Radio Samoa, Sagala Ane Ponifasio e faapea, “O le leitio o se tasi o Auaunaga Moomia poo le Essential Service, ma e tatau pea ona faaauau lana tautua e ui ina ua toogaogao le aufaigaluega”.

O le taimi nei o loo faaaogaina tekonolosi faaneionapo e mafai ai ona tuuina mai pea faasalalauga a le Radio Samoa i fafo atu o potu faasalalau.

E pei ona silafia o le toatele o i latou ua aafia i le Koviti-19 i Niu Sila aemaise Aukilani, o tagata Samoa lava. Ma ua molimauina le matautia o le pepesi o le ituaiga fou lea o le Delta variant, e lē faailoga tagata. I ripoti lata mai o le Koviti i totonu o Niu Sila i le asō, lea ua oo atu ai le aofa’i i le to’a 562 i latou ua aafia. I lea fainumera e to’a 73 o tagata faigaluega (essential workers).

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required