E to’alima pagota o loo tuli faasalaga i le falepuipui i Tanumalala ua maua i le siama o le faama’i koviti-19 ma ua iai le nofoaga faapitoa i le toese ua faanofoesea ai. 
 
E le gata i lea ua iai foi ma leoleo o le falepuipui ua aafia ae ua faaalia e le Sui Komesina o loo vaaia le nofoaga ia Afamasaga Samuelu e leai se tulaga e faapopoleina ai i lea vaega ua lava tapena gaioiga uma e faatino mo pagota ma leoleo o le toese ua maua i le siama o le faama’i. 
 
O le suesuega o le taumafaiga o nisi o pagota e sosola mo le taimi nei e silia i le to’a 10 pagota ua maea faia moliaga ae o le a faagasolo pea le suesuega ma le faamoemoe e tatau ona maea i le faaiuga o lenei vaiaso ma iloa ai le aofaiga uma o pagota e molia. 
 
O nisi o i latou ua faia moliaga ua faamautu i potu ma sela ua fausia faapitoa mo i latou e faigata le vaaiga poo le maximum security cell peitai ua faaalia e Afamasaga e le’o se faasalaga ua mafua ai lea tulaga ae ua taumafai e faaititia le numera o pagota e nonofo i potu lea na talepe e nisi o i latou loka o faitoto’a ma mafai ai ona o i fafo. 
 
O le numera lava o pagota i ia potu tetele e 60 ae na suia loa le Pulega o le falepuipui e pei ona faailoa e Afamasaga taumafai loa e faaititia i le na’o le to’a 40.