Ua faamaonia mai nei e le auaunaga a le soifua mālōlōina le Health New Zealand (Te Whatu Ora) le aafia ai o masini komepiuta ma auala o fesoota’iga faatekonolosi a falema’i o loo i le itu i Saute o le North Island.
O le lona lua ai lea o matāupu faapenei ua tula’i; o lea na faamauina sa tupu foi lea faafitauli i falema’i i le Southern District, e pei ona faamanino e 6 lelei itulā o faalētonu masini i le Aso Toona’i.
Na lē mafai ai ona faatino nisi o galuega i itu tau faamaumauga i falema’i i Ueligitone, Hutt ma Wairarapa ma le tele o galuega faatino a nai tagata faigaluega.
Faamanino e le Health NZ e lē o se osofa’iga na māfua ai lenei faafitauli, ma faamaonia mai o loo malupuipuia uma faamaumauga a gasegase.
Ae ua faamatala e se tasi o tagata faigaluega o se faalētonu tele le lē mafai ona faatino o a latou galuega i le vaaia lelei o gasegase pe a lē maua faamaumauga ma faamatalaga a i latou o loo moomia le fesoasoani.
E tusa ai ma faamatalaga, o lea na faamauina le alu ai i tua i tagata faigaluega, o ni tusitusiga poo se imeli, e faamanino mai le faatamala o sui o IT poo ē e nafa ma le māta’itūina o fesoota’iga televavave i le faailoa vave ai i sui uma le tulaga faalētonu e ono tuai ai galuega aemaise vaega o faalavelave tutupu faafuase’i.
Faaalia e le Asosi ua faaigoaina o le Association of Salaried Medical Specialists ua tele aafiaga o nei auala o fesoota’iga ma ua tele foi masina o fetaia’i le auaunaga ma lenei faafitauli ma ua oo ai i se tulaga ua faaaogā ai e tagata faigaluega auala e faigofie lava ona maua e i latou o loo faia gaioiga o osofa’iga faatekonolosi.
Puna o Faamatalaga: https://www.rnz.co.nz/news/national/584179/health-nz-confirms-another-major-tech-outage
