O aiaiga o le feagaiga ma le kamupani e ana le vaalele 737-800 lea ua toe faafoi, ae sa fuafua e aumai faalisi mo le valu tausaga e faaaogā e le Samoa Airways, sa ono feagai ai le kamupani vaalele a le atunuu ma ni aafiaga tau tupe e faaopoopo i luga o isi faaletonu tau tupe.
Peitai o le lāgā pea e nisi o faipule o le Itu Agai o le tāua o le aumai pea o le vaalele, na faailoa ai i se finagalo tali o le Minisita o loo iai le vaaia o le kamupani vaalele o le Samoa Airways, o le 90 pasene o le 160 miliona sa fuafua e toe totogi i le kamupani na lisi mai ai le vaa ua lē totogia. Ua na o le 10 pasene o le a totogi poo se vaegatupe e tusa ma le 16 miliona tala. Na faailoa e le Minisita le tofa Leatinuu Wayne Sooialo i le Palemene, o lea ua lata ina mae’a feutaga’iga ma le kamupani e ana le lisi o le vaalele.
Leatinuu Wayne Sooialo: “Ae ou te fiafia e faalauiloa atu i lau afioga a le Fofoga Fetalai ma le mamalu o le fono aoao faitulafono, e tusa ma le 90 pasene le aofa’i o tupe ua faasaoina mai i le toe faafoiina o le vaalele pe a faatusatusa i se tupe ua fuafuaina e tusa ma le 160 miliona tala pe afai e oe faafoi le vaalele i fuafuaga a le malo talu ai. A faatautaia feutagaiga mo le toe faafoi ai o le vaalele, e tele lava ni faafitauli na alia’e mai ai i le tatou kamupani. O le 2019 lea na gata ai ona su’eina tusi a le kamupani ae momoli lava la’u faamālō i le komiti filifilia a le Kapeneta na feagai ai ma le galuega tāua, ua mafai ai nei ona toe faafoi le vaalele ma tau sailia auala e fesoasoani e faaitiitia ai aitalafu a le kamupani. A o tau salili foi nisi faiga faapaaga e fesoasoani mo faigamalaga a o tatou tagata i Samoa ma atunuu e mamao……..
………O loo iai foi le faamoemoe i lea lava komiti ina ia faataunuuina i se taimi vave lava le su’eina o tusi a le kamupani mo le tausaga faaletupe e 2020 ma le 2021 ae tuuina mai i le fono aoao faitulafono mo le atoaga ua iai nei le pagatia o tulaga tautupe a le kamupani. Mo le silafia e tou afioga, ia o loo taumafai lava e su’e tusi o le 2020 ma le 2021 ona o le tele o galuega ua toe fetuuna’i ma le lē mautinoa o tulaga tau tupe aemaise ai aitalafu a le kamupani, na taliaina ai e le Kapeneta se talosaga, mo le tofiaina o se komiti faatonu lē tumau poo le interim management board, e faatinoina se iloiloga atoatoa e 300 degrees, lona uiga e matuā toe iloilo atoa le kamupani, e 360 degrees review, o le kamupani aemaise ni faiga faapaaga mo femalagaa’iga a vaalele i Samoa ma atunuu e mamao, ma se’i vaavaai foi pe alagatatau ona toe faatinoina e le kamupani lea auaunaga pe faatinoina loa i se faiga faapaaga.”
O sui o le komiti faafoe o le kamupani vaalele mo se taimi lē tumau o le afioga Tupuola Koki Tuala, Fauo’o Fatu Tielu o se tamalii sa tauaveina le pulega o le kamupani vaalele i ni tausaga ua mavae, ma le Taimalie Charlie Ah Liki.
E to’atolu sui o le komiti faafoe i le taimi o le faigamalo sa iai ua lipotia le faamuta o lo latou taimi galulue e le Kapeneta o le faigamalo fou, ae lei oo i le taimi e mae’a ai, o le susuga Papalii Sonja Hunter, afioga Tuia Paepae Letoa, ma le afioga Muagututi’a Lafaele Ngau Chun.
