Ua tatala nei i Samoa le atina’e tau pisinisi faletalimalo a le Ekalesia Asofitu Samoa Tutoatasi poo le SISDAC, ma o se taumafaiga na mafai ona faatino i se nonogatupe mai le faalapotopotoga o le faaputugatupe o le lumanai manuia o tagata le NPF.
O le tatalaina o lea faletalimalo ua faaigoaina o le Anavamoana Hotel na faailoa ai e le teuoloa o le ekalesia aoao e 9 tesimale 3 miliona tala na faatau ai e le ekalesia le Moanalisa Hotel i Vaitele tai, lea ua toe fausia ma faafou nisi o ona vaega ma avea o se meatotino a le ekalesia e pei ona suia ai ma le igoa o le faletalimalo.
Ua faailoa foi i le tatalaina o lea atina’e le iai ma nisi o auaunaga faaopoopo ua aofia i le faletalimalo e tali ai le manao o tagata e afea mo ni fonotaga faapea i latou e faamautu ai.
O le ta’ita’i aoao o le Ekalesia Asofitu Samoa Tutoatasi sa auai i le tatalaina faatasi ai ma nisi o le au mautofi o le ekalesia mai atunuu i fafo.
O le afioga i le Sui Palemia na saunoa e tatala aloaia lea atina’e tau faletalimalo.
Sa tapenaina e le ekalesia se taumafataga ma faaaloaloga masani mo malo valaaulia aemaise o sui o le Malo sa auai.
