I le va o le masina o Oketopa o le tausaga na te’a nei seia oo mai i le masina o Mati o le tausaga nei, e 810 tagata mai Samoa Tutoatasi na ulufale i Amerika Samoa i le pemita fitu aso.
Ua faailoa lea aofaiga o tagata mai Samoa na malaga i lea pemita i le mae’a o le fono a le Atoa o Samoa, a o faagasolo tapena ai e le ofisa o le Loia Sili a le Malo o Tutuila ma Manu’a se pepa faataga mo pasese mai Samoa Tutoatasi e malaga i le pemita fitu aso.
O le faamoemoe o lea faiga ina ia taofia ai le tulai mai o faaletonu e pei ona sa totogi ai e le kamupani vaalele o le Samoa Airways ni sala tupe ona o ni tagata malaga poo pasese na tauave e le kamupani vaalele e aunoa ma le maua o se faatagana poo se approval o le pemita fitu aso e ulufale ai i le teritori.
