O le asō na faataunuuina ai se sauniga aloaia mo le tauaaoina atu o Harvest Bins ma masini mo le vaega Fa’asu o Samoa, e tauala mai le faigapaaga a le Matagaluega o Faatoaga ma Faigafaiva ma le faalapotopotoga o le PACER Plus i le Pasefika. 

I pepa o faamatalaga, i le saunoaga a le afioga i le Minisita, Laauliolemalietoa Leuatea Polataivao Schmidt, na ia ta’ua ai le “tāua o le aogā o lenei faama’ite, e lagolagosua ai i le au faifaatoaga faapea ai foi le faaleleia ma le siitia ai o le lelei o oloa auina atu mo maketi i fafo”. 

Na faaopoopo le alii minisita, o lenei faamoemoe o le a feasoasoani tele e foia nisi o lu’itau o loo feagai ma le toatele o le aufaifaatoaga ma le au aveoloa i le feaveaiina ma tapenaga lelei o fua o faatoaga mo le auina atu i maketi i fafo.  

Ta’ua e le faauluuluga o le Pacer Plus, Roy Lagolago, o loo iai le faamomoe e latou te lagolago lenei faigapaaga, “mo fesoasoani e tuuina mai mo le faaleleia o atinae eseese mo le lumanai manuia o Samoa”. 

Faaalia le agaga faafetai e le Afioga i le Minista o Faatoaga ma Faigafaiva, le Malo o Ausetalia ma le Malo o Niu Sila, e tauala atu i le faalapotopotoga a le PACER Plus mo le faatupeina o lenei fesoasoani tāua. 

Mo le silafia o le PACER Plus o se tasi lea o faalapotopotoga o loo galulue e siitia tulaga tau fefaataua’iga ma atinae i totonu o le Pasefika.