O tapenaga a le aulakapi taitoafitu a le Manu Samoa i le filiga ma le tinou o le ‘au atoa ai ma le faiaoga ma le pulega e pei ona a’e manuia lana finau ua maua ai le avanoa i taaloga a le Olimipeka, ua faailoa ai e le faiaoga ulu ma le pulega le faafetai tele i le atunuu aemaise o le Malo ma pisinisi i le lagolago ia latou tapenaga a o lumanai le taamilosaga a le Oceania sa faagasolo i Brisbane i Ausetalia i le vaiaso ua mavae.
O le lagolago a le atunuu i kamupani ma pisinisi faapea nisi o matagaluega a le Malo na maua ai e le ‘au taitoafitu a le Manu Samoa se tinoitupe e 77 afe 700 tala, sa fesoasoani i le tele o a latou tapenaga.
Faaalia e le faiaoga ulu le afioga Muliagatele Brian Lima, o le agalelei o le aao mafola, ma faamanuiaga ma faamalosiau sa tuuina atu, sa mafanafana ai le au atoa ma lagona le pa’i atu o le lagolago a le atunuu a o alo faiva i le sailiga o sona avanoa i le Olimipeka i Farani i le tausaga fou.
