O le ogaoga o aafiaga o le tamaoaiga o Samoa e mafua i le faama’i misela na sosoo ma le faama’i Koviti-19, ua feagai ai le Malo ma taumafaiga e toe tulei galuega mo atina’e eseese ina ia togafiti ai ia tulaga faaletonu.
Ua mafai ona faatino ia taumafaiga i se foa’i tupe mai le Faletupe o le Lalolagi mo Samoa e 63 miliona tala poo le 23 tesimale 7 miliona tupe Amerika.
Ua faaalia e le tamaitai minisita o Tupe le afioga Mulipola Anarosa Ale Molioo o lea agalelei o le faletupe o le lalolagi o le a mafai ai ona lagolago i galuega ua faataoto mo le toe faaleleia o le tamaoaiga o le atunuu aemaise lava i vaega o le toe poupouina ia malosi atina’e e pei o tagata tafafao mai fafo, ma pisinisi tuma’oti.
Ua vaevaeina lea fesoasoani tau tupe i le faasafua atu o le 37 tesimale 2 miliona tala Samoa i le vaega lua poo le phase two o taumafaiga tau atina’e gafataulima, ma le 25 tesimale 8 miliona tala mo isi galuega lava e fesoota’i i le siitia o atina’e lautele ma o lea vaega o le fesoasoani na faamatuu mai i le masina o Me o le tausaga nei.
