E 3 miliona, tasi le selau afe tālā le fesoasoani tupe mai le polokalame o le puipuia o le siosiomaga a le lalolagi o loo va’aia e le Faalapotopotoga Tuma’oti a Malo Aufaatasi mo polokalame o le atina’e le UNDP, faaopoopo iai ma le lagolago a le Malo o Ausetalia ua fa’aauala mai ai lea foa’i tupe tele, ua faamanuiaina ai nisi o aulotu ma faalapotopotoga tuma’oti i totonu o nu’u ma afioaga o le atunu’u.

O le aofa’iga atoa o ia faalapotopotoga ma aulotu e 62, ma o le 45 o poloketi o le a faasoa iai le 2.3 miliona tālā i le polokalame o le Samoa Cares lea o loo lotolotoi ai le malo o Ausetalia, ae o le sefulufitu o poloketi o le a faasoa iai le 800,000 tālā i le polokalame tupe fesoasoani mai le Global Fund mo le puipuia o le siosiomaga.

Advertisement

I le pepa faalauiloa mai le ofisa o le malo o Ausetalia i Samoa, o loo faailoa ai e le faifeau o le uluai Ekalesia Penetekoso i Nu’u fou, le susuga Norman Faafetai, o se fesoasoani tāua mo lana aulotu ua maua ai molī e ola i le malosi o le la, āua ua le gata ua manuia ai lana ekalesia ae faapea i le lautele o tagata.

E 135 tusi talosaga mo vaegatupe mai lea fesoasoani ma filifilia ai le 62 o poloketi e faasoa iai le tolu miliona ma le selau afe tala. O lea aofaiga ua aofia ai poloketi i Upolu ma le motu o Savai’i.