E 6 miliona ua tuuina e le malo e fesoasoani ai i pisinisi ua aafia i osofaiga ua faaaogā ai taavale e faaleaga ai faleoloa ma gaoia.

O le paketi lea ua folasia e le malo i le asō e tauala mai i le Minisita o Leoleo Poto Williams, lea na ia ta’ua o le 6 miliona lea o tupe maua mai le Proceeds of Crime Fund ma ua tuuina e inivesi i tulaga faapea e pei o le faapipiina o masini tau le puipuiga e alofia ai le tulai mai o nei ituaiga osofaiga. 

Fai mai le minisita ua o latou faalogoina le popolega o nai pisinisi laiti ma faleoloa ua aafia i nei ituaiga solitulafono. Fai mai leoleo e ui e lē fou soligatulafono nei o ram raids e pei ona faaigoa ai i le faaperetania peitai ua vaaia lava le siitia o le aofai o tagata talavou e aofia ai. 

Fai mai le minisita e lē gata i aafiaga i le aufaipisinisi i mea e faaleagaina ae o mafatiaga foi i le tulaga faalemafaufau ma e ono iai aafiaga tetele i tagata, le aufaipisinisi ma o latou aiga. O le a faatonutonuina la e leoleo le faatuina ma le puleaina o le faatupega o nei fesoasoani mo pisinisi laiti ma o le a amata lava i Aukilani.  

Ua faailoa foi le agaga faafetai o le ofisa sili o le Retail NZ Greg Hartford i le folasaga mai le minisita ma le malo, fai mai a ia o se folafolaga lelei ma malosi.