Search
Search

Toe fafagu le aufaifaiva i le tāua, o le lapopo’a o i’a ma figota e tatau ona fagotaina

Ua toe saga faamalosia aiaiga o le tulafono faatonutonu o le fua faatapulaa o i’a ma figota o le tausaga e 1995 e ala i se a’oa’oga mo le aufaifaiva o loo fagotaina lo tatou gataifale, faapea le aufaatau i’a ma figota ina ia o latou silafia ai le tāua o le lapopo’a o i’a e tatau ona fagota ma faatau ae faapea foi i figota.

O se aiaiga tāua o lea tulafono e tatau foi ona malamalama ma silafia e sui o nuu ma sui o matagaluega a le Malo ma faalapotopotoga tuma’oti aemaise o a’oga ma tagata lautele.

O le maketi o i’a i Apia sa faagasolo ai se a’oa’oga i le ogatotonu o lenei vaiaso e autu i le faatāua o le fua faatatau o i’a ma figota i faigafaiva.

Ua iai nisi ua molia ma faasala e le faamasinoga ona o le laiti o paa ma i’a ua latou fagota ma faatau.

E lē gata o le lē tausisia o le lapopo’a e tatau ona fagota ai se i’a ma se figota e maua i le aloalo ae o nisi sa molia i le laiti tele o faisua ua latou fagota ma faatau atu i le atunuu.

O tuipa’a limago laiti le isi o tausami o le gataifale o loo vaaia le faatau i le maketi o i’a i Savalalo i Aso Sa, ma e masani ona lē folaina i luga o laulau ona o le laiti tele.

Na faaalia e le matagaluega o faatoaga ma faigafaiva o le a’oa’oga i Upolu o le a faia foi i Salelologa i Savaii i le faaiuga o le vaiaso nei.

O se a’oa’oga ua ogatasi ma faiga faavae a lea matagaluega mo le atina’e ma le puleaina tatau o faigafaiva ma le vaaia lelei o i’a ma figota, ina ia lava taumafa ma ia manuia tagata o Samoa mai le tamaoaiga o le sami ma le gataifale.

Ua saunia e le vaega o faigafaiva, laupapa ua faatutū i le maketi o i’a i Savalalo ae faapea foi i le maketi o i’a i Salelologa e silafia ai le aufaifaiva ma le aufaatau i’a aiaiga o le tulafono o loo faatonutonu ai le lapopo’a ma le tetelē o i’a ma figota e tatau ona faaaogā.

O le afioga i le Minisita o Faatoaga ma Faigafaiva na saunoa e tatala le a’oa’oga i le motu o Upolu.

Tala sili ona faitaulia

TALA FOU MAI SAMOA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required