Ua lipotiaina, le faato’ai e le kalapu liki a le Canterbury Bulldogs se talosaga mo se totogi faamāmā avega i le pulega o le NRL, a o fetaia’i le fetu talavou o le ‘au ia Karl Oloapu ma se tulaga lē mautonu o lona lumanai i le mae’a ai o se taotoga sa faia i lona ua.
O le faataotolia ai o lea tama talavou e na o le 19 tausaga o le a ia misia ai le taamilosaga atoa ona o lona manu’a, lea sa faia ai sona taotoga, ma lē mafai ai ona avanoa mo le Bulldogs.
Lipotia e le lomiga a le Sydney Morning Herald, ua tapaina e le kalapu se tulaga faapitoa e faia i le tapulaa o latou tupe faaalu mo le totogi o Oloapu, lea e tusa ma le $350,000.00 i le tausaga seia aulia le 2026.
Ta’ua ai, e fitu taaloga sa taalo ai Oloapu mo le ‘au numera muamua a le kalapu, ae peitai sa aafia se tifa o lona ua ma faamalosia ai e toe faaui mai i tua ma le ‘au a le Toa Samoa i le faaiuga o le tausaga talu ai.
O loo manao le kalapu e ave lo latou faamoemoega mo Oloapu e toe taliu ai i le malae, ae peitai o se molimau e iai le malamalama i le mataupu e lē o faataga e talanoa faalauaitele ua ia lapataia, o ni manatu faafomai sa latou tapaina lea tama talavou e aua ne’i lamatia le toe aafia i se isi manu’a.
