I le mae’a ai o le 17 vaiaso poo le fā masina ma le vaiaso o feagai le vasega fou o alii ma tama’ita’i leoleo ma a’oa’oga i le faatinoina o tiute mo lea tautua i le malo ma le atunuu, o le vaiaso nei na faamautū ai le sauni atu o lea vasega e to’a 51 e aofia ai alii e 40 ma tama’ita’i e to’a sefulutasi e ala i le faia o a latou tautōga.

O luma o le afioga i le Faamasino o le Faamasinoga Faaitumalo, le afioga Leota Matautia Raymond Schuster na faatino ai tautōga o se pine faamau o le ofoina o o latou ola ma soifua e tautua ai Samoa ma tausisia le tulafono faavae o Samoa aemaise o le faamalosia o le tulafono, puipuia tagata ma meatotino ma faamaoni i le tauaveina o tiute faaleoleo.

Ua fetaui le vasega fou o malu o le malo ma le tele o galuega o le a feagai ma le Matāgaluega o Leoleo, Falepuipui ma le Toe Fuata’ina i le tumutumu o le taulaga i le masina fou i le faamanatuina o le tuto’atasi. 

E ulufale atu lea suiga fou o leoleo e faaopoopo ia i latou o loo auauna ma galulue i le matāgaluega, ae ua siitia tulaga faaleoleo o le to’a valusefulutolu o malu o le malo.

O le siitia o tulaga faaleoleo o se faailoga o le amana’ia o le maualuga o le faatinoga o le tautua faaleoleo aemaise ua pasi su’ega i matāupu o le tulafono.