O le vaiaso nei o le a faalogoina ai si’ufofoga ma le tapisa o alo ma fanau a le Pasefika i le Manukau Sports Bowl ona o le faataunuuina o le faaaliga aupito tele o tu ma aga a le Pasefika, le Polyfest e pei ona iloa ai.

O le tausaga lenei e atoa ai le 50 tausaga talu ona faavaeina ma e fā aso o le a faataunuu ai, mai le aso 2-5 o Aperila ma e silia ma le 60 a’oga ma le faitau afe o le aufaafiafia o le a auai ai e faatāua ma faamanatu tu ma aga a atunuu Polenisia.

O lenei faamoemoe e faatāua ai taleni ma le tomai o talavou e ala i faafiafiaga eseese aemaise le musika ma togiga faapea foi i tautalaga o le a faatinoina ai tauvaga o le faamoemoe.

E ono fola poo stages o le a aofia ai Maoli, Niue, Le Atu Kuki, Tonga, Samoa faapea le diversity stage ma e lē taumate o le a faatumulia foi i aiga ma uo aemaise le aulagolago i nai fanau ma a latou tapenaga mo le Polyfest o lenei tausaga.

Na faailoa e le faatonu o le Polyfest i le RNZ, Seiuli Terri Leo Mauu, e tulaga ese ma lagona le agaga faamaualalo i le mātau atu i le tulaga ua oo iai le Polyfest talu ona amata mai i le 1976 i le Kolisi a Hillary, e na o le fā a’oga na amata ai e aofia ai Kolisi o Aorere, Hillary, Seddon ma Magele ma e faamamafa lava le faatāua i le aganuu nai lo le aofa’i o tagata e auai.

Puna o Faamatalaga: https://www.rnz.co.nz/international/pacific-news/556677/the-50th-anniversary-of-polyfest-what-you-need-to-know