Search
Photo Credit: Hosanna Christian Church

50 le vasega faauu o le Aoga Tusi Paia a le Hosanna Christian Church

O le uluai taimi lenei ua faatautaia ai le aoaoga Tusi Paia e ala i se faigapaaga a le Ekalesia o le Hosanna ma le Kings Leadership College lea ua faauuina ai le 50 o i latou sa auai i lenei aoaoga o lenei tausaga.

I le sauniga o lenei faamoemoe na saunoa ai le Aposetolo Dr. Joshua Asafo Avia o le Ekalesia Hosanna mai Brisbane i Ausetalia e faafetaia ai le taumafai o le vasega faauu.

“Faafetai atu i le galulue ma le toaga e saili i Afioga i le Atua ma e ese ma le manaia o tatou iinei i Samoa e le fou lea mea o le alu i le aoga Tusi Paia masani foi i faauuga.

“A o mātua e ave le fanau i le aoga e o ma le mafaufau poo le ā le mea o le a aoga ai le la fanau, e tatalo ma talitonu e taunuu manuia taumafaiga ae o la’u fesili ia outou o le a lou faamoemoe na e iai i lou alu ai i le aoga.?

“Poo le ā le mea e avatu e le Atua i lou loto ia e sauni e luitauina ai oe ona faagasolo lea i isi meaalofa o loo ia sasaa mai mo oe.” 

Saunoa foi le Faafeagaiga o le Hosanna Christian Church i Samoa nei, Pastor Aumua Eric Poe e tusa ai o le faatautaiga o lenei aoaoga.

“O le aoga na amatalia e 52 i latou na resitala ae oo mai i le asō e 50 i latou ua faamae’aina le certificate muamua mo le aoga i lenei tausaga.

“O le tausaga atoa lenei e toaiva faiaoga mai fafo na malaga mai e faafoeina le aoga ae o le aoga foi lenei toeitiiti lava iai uma Ekalesia o loo i le atunuu.

“O le isi foi vaega o le aoga lenei, poo le ā le mamao o afioaga o loo nonofo ai, e taupati mai lava e auai i vasega taitasi o loo faatino e pei o nisi o sui mai afioaga o Saanapu ma Mulifanua, e ese le totoa o nei tagata e malaga mai i le 6 i le afiafi uma le aoga le 9 i le po.

“Afai la lea e mafai e i latou o nonofo mamao ma le nofoaga e fai ai le aoga ma tatou lea e latalata mai, ou te ofo ae e lē mafaia.”

O le faamoemoe o le Aoga Tusi Paia lenei e faaauau pea ina ia tomatauina pea le soifua faaleagaga o tagata e suesue ma silafia le finagalo o le Atua i aoaoga faale-Tusi Paia.

Tala sili ona faitaulia

SAMOA UPDATE

TALA FOU MAI SAMOA

Tapunia lala a le ASB 

E 5 lala o le faletupe a le ASB o lea ua tapunia.  O lala i Mangere Bridge i Aukilani, Milford, Wellsford, Waiuku ma Willis

Toaono na pue e leoleo ona o tapaa

E toaono alii mai Vitoria lea ua feta’ua’ina le molia i le asō ona o le taumafai e aumai faasolitulafono sikaleti ma tapaa e miliona

Keep uptodate with Radio Samoa activity & promotion

* indicates required