E fā moliaga tau feusuaiga o loo molia ai se alii puleaoga, ma o loo ia teena uma ina ua valaau lana mataupu i luma o le afioga i le faamasino o le faamasinoga faaitumalo o Leota Raymond Schuster.
Na talosagaina e le tamaitai loia o loo tulai mo lea uluaoga, le faia o ni suiga i le talosaga e tatala ai lea alii i tua, faapea ai ma le talosaga e tapu ai ona faailoa le suafa o lē o loo molia.
O ia talosaga o le a iloilo e le faamasinoga i le asō, aemaise na faailoa e le faamasino e tatau i le tamaitai loia ona tuu atu mafuaaga e tatau ai ona tapu le faailoa o le suafa o lē ua molia.
O lea mataupu, na faaalia e le komesina o leoleo o Auapaau i lea taimi, o se fiafia i le mae’a ai o le tausaga faaleaoaoga mo alii ma tamaitai faiaoga a le kolisi maualuga i le masina o Tesema o le tausaga na tea nei lea na tulai mai ai.
Ta’ua e Auapaau e tusa ai ma lipoti e faapea e faatolu na taumafai lea puleaoga e faamalosi le tamaitai faiaoga o lana lava aoga peitai na teena e lē ua tagi.
O le aso 2 o le masina o Me o le tausaga nei ua faatulaga e iloilo ai lea mataupu, ae o loo nofo taofia pea lea puleaoga seia mae’a iloiloga a le Faamasinoga i lana talosaga pe tatala i tua pe leai.
