E 23 tausaga le matua o se alii talavou ua amata tuli lona faasalaga e 46 masina i le falepuipui ina ua ioe i moliaga o le gaoi ma le talepe fale.
E valu moliaga o Anesi Atonio o Magiagi mai ni osofaiga na ia ulufale faamalosi ai i ni potu ma ofisa o ni aoga se lua, ma ni fale o ni aiga ma ia aveesea ai i se auala solitulafono ni meatotino taugata ma anagata e pei o masini ma komepiuta ma telefoni feaveai.
O le tau atoa o meatotino aogā ma tāua sa ia gaoia e $30,056.20 sene.
O nisi o solitulafono na ia toe faatino a o faatali suesuega a le faamasinoga i isi ona moliaga.
O le tuutuuga o lona faasalaga e tuli muamua le 2 tausaga ma masina e ono i solitulafono sa molia muamua ai, ona faato’ā tuli ai lea o le 16 masina i le falepuipui mo isi solitulafono tau talepe fale ma le gaoi na molia mulimuli ai.
