E sefulu mafutaga ma faalapotopotoga tuma’oti i lo tatou atunuu ua afea i le agalelei o le malo o Ausetalia, ma ua latou maua vaegatupe mai le 10 afe e oo i le 60 afe tala Samoa, e faatupe ai a latou atina’e o le a manuia ai o tatou tagata.
Ua faailoa e le ofisa o le malo o Ausetalia i Apia o lea fesoasoani ua faaalu ai se vaegatupe e tusa ma le 456 afe, 284 tala ma le 57sene.
O nisi o atina’e o le a faaaogā i ia vaegatupe o le saunia o nofoaga e maua ai le eletise i le malosi o le la, a’oa’oina o le tomai o le su’isu’i, fausia o fale komiti, atina’eina o faato’aga o laau’aina ma fualaau faisua.
O le a faatau ai foi tanevai, faatau ai afi eletise, faamoli ai laoa ma maota o nisi o aiga, ma ta ai ni paopao se sefulu i le faamoemoe e maua ai e tupulaga ma fanau se tomai e faatino ai lea vaega tāua o le tatou soifuaga faasamoa o le tāina o vaa auā o se tomai ailoga o toe to’atele nisi o iai se silafia.
O faalapotopotoga ua faamanuiaina i foa’i tupe mai lea fesoasoani a Ausetalia o le aufaifaato’aga a le nuu o Gagaifolevao, faifaato’aga i Tapatapaō, o le faalapotopotoga o tina nofotane i le afio’aga o Malaemalu, o Alo Su’a ma fanau a Falefia i Saloga, o le Autalavou a le EFKS i Puleia, Aumaga ma taulelea o le nuu o Paepae’alā, komiti a tina o Siumu, faalapotopotoga o tina nofotane a le afioaga o Luatuanuu, alii ma faipule o Satapuala ma le afio’aga o Leulumoega tuai.
