O le a’oa’oina o tomai faafomai ma tausi soifua i le Iunivesite Aoao o Samoa, ua auala mai ai se foai a le Iunivesite o Brigham Young poo le BYU i le setete o Hawaii e fesoasoani ai i le faatinoina o a’oa’oga a alii ma tamaitai o loo aooga faafomai ma tausi soifua i le iunivesite a le atunuu.

O se pusaoloa tele na aumai ai lea foai o totoga eseese ma laei mo galuega faafomai, ua tuusa’o i aao o le pulega o le iunivesite aoao o Samoa.

Ua faailoa i se pepa o faamatalaga sa tuufaatasia lea foai e le vaega o loo feagai ma le poloketi o suesuega o le gasegase o le galogalo o mea le alzheimer’s research project i le iunivesite o Brigham Young ma nisi o Samaria agalelei i le setete o Utah i Amerika.

O se tamalii o le tatou atunuu o loo galue i lea iunivesite le tofa Namulauulu Dr Gaugau Tavana sa fai ma sui o le aumalaga e faailoa le foai i se sauniga na tuuina aloaia atu ai i le pulega o le Iunivesite aoao a Samoa.

O le Iunivesite o Brigham Young o se nofoaga o a’oa’oga mo faailoga maualuluga a le Ekalesia a Iesu Keriso o le Au Paia o Aso e Gata ai.

O se ekalesia o loo tele nisi o ana fesoasoani e ala i foai ua taulimaina e le matagaluega o le soifua maloloina e lē gata o totoga mo togafitiga o gasegase ae o nofoa faataavalevale ma tootoo mo i latou e iai faaletonu i o latou aao poo vae.