E toa 44 le vasega fou o alii ma tamaitai leoleo ua mae’a a latou aoaoga ma ua mae’a ona faatauto i le faamasinoga, ua sauni i le latou faauuga i lenei vaiaso, ao lumanai ai ona faatino o latou tiute faaleoleo i vaega o le matagaluega o leoleo o le a galulue ai.

E fulisia i le itupa o tamaitai le vasega fou o leoleo e 33 ae toasefulu tasi alii.

O le latou tautoga faaleoleo na faia i luma o le afioga i le faamasino o le faamasinoga faaitumalo le afioga Mata’utia Leota Raymond Schuster.

Na ave iai apoapoaiga ma fautuaga a le faamasino mo leoleo fou ina ia tautuana le faamaoni ma savavali i ala o le tulafono.

O le Aso Tofi nei o le a faauu ai i latou ma laei ai foi togiga o Malu o le Malo.