I le 407 o le vasega faauu a le Iunivesite Aoao o Samoa ua maua faailoga tikeri, o tipiloma, tusipasi ma faailoga maualuluga atu i le faauuga na faatino i le Aso Faraile na tea nei.
Ua molimauina le toatele pea o le aofaiga o le ituvai o tina ma tamaitai e faamanuiaiina i le mae’a o aoaoga mai lea tausaga i lea tausaga.
O le faauuga muamua o lenei tausaga e 295 tamaitai ua maua tusipasi ma faailoga maualuluga, ae na o le toa 112 le itupa o alii.
E fua lea tulaga i le maualuga pea o le numera o tamaitai e faauu ma maua faailoga ma tusipasi, i le talafaasolopito o le Iunivesite aoao a le atunuu na amata faavae i le tausaga e 1984 ma ua 39 nei tausaga o lona matua.
O le lauga na saili mo lea faauuga o le afioga Luamanuvao Dr Dame Winnie Laban, ua faaee iai e le Iunivesite le faailoga taualoa o le Honorary Doctorate of Letters, e amanaia ai lona sao i le ola aoaoina o fanau a Samoa a o avea ma sui o le komiti faatonu a le Iunivesite a le atunuu mo le iva tausaga, aemaise o lona sao i le soifua aoaoina ma le atiina a’e o tagata Pasefika i totonu o Niu Sila.
Le afioga Luamanuvao Dr Dame Winnie Laban, i se vaega o lana saunoaga na autu iai le faauuga a le Iunivesite Aoao o Samoa.
O le faaiuga o le tausaga le faauuga masani a le Iunivesite mo fanau o loo aooga i le tausaga muamua o mataupu faaiunivesite.
