Ua toe o ni nai aso ona talimalo lea o Samoa i se tasi o faamoemoe e ala lea i le taamilosaga alogavaa a le lalolagi lea e amatalia i le amataga o le masina fou.
E le gata i le tapenaina o vaega uma o le faamoemoe ae o loo sauni foi le ‘au a le atunuu e tauva ai i lenei taamilosaga.
Na ta’ua e le Peresitene o le Asosi o Alogavaa i Samoa Matthew Wendt, e feololo le fuainumera o le ‘au filifilia a Samoa lea ua iai i le taimi nei.
“O le 40 lea e aofia uma ai i latou mai fafo ma Samoa nei lea la e tapena atu ai le vaega laiti 16 ma le 19 tausaga, vaega a le Opens ma le Master 40 i le vaa nofoa 6 ia ma le tamaitai o le a tauva i le vaa nofoatasi i le vaega a le au matutua poo le Senior Master.
“O loo lelei lava a matou toleniga ma o loo taumafai lava ia maua le taimi e pei ona fili mai lava i latou e faia le ‘au i taimi o toleniga na faatino o loo malamalama uma i le tulaga o loo naunau ai.
“O loo faaaogā foi nisi o auala faatekonolosi poo le GPS e mataitu ai tulaga o toleniga a tagata taitoatasi.”
O le lona tolu ai lea o taamilosaga ua auai ai Samoa e pei ona tauva ai i Tahiti i le 2017 ma Ausetalia i le 2019.
“O le faafitauli tele lava o feagai ai ma le ‘au o le utiuti o le taimi e tapena ma tuufaatasia ai le ‘au i taamilosaga maualuluga faapenei.
“O le mafuaaga lava o le lē mautonu i le tulaga tau seleni e faatino ai lenei faamoemoe o le isi itu o lea faatoa tatala femalagaa’iga.
“Ae ui i nei mea uma o loo galulue malosi pea si a matou vaega e faamae’a nisi o fuafuaga ina ia sao ma uli lenei faamoemoe o le a alo atu iai.”
E 29 atunuu o le a talimalo ai Samoa i ‘au o le a taunuu mai i fanua mo lenei faamoemoe o loo ave ai foi le lagolago a le Malo o Samoa faatasi ai ma pisinisi ma nisi o faalapotopotoga i le atunuu.
