Ua tuli nei le faasalaga e fā tausaga ma le ono masina o se alii matua ua 40 ona tausaga, e mafua ina ua faamaonia lona faia o se solitulafono tau faiaiga i se teineititi 15 tausaga e iai ona aafiaga tumau.

O lē ua faasalaina ma molia e iai lona piitaga tau aiga i le teineititi na aafia, ma o le faanoanoaga lea o le faamasinoga o le aliali mai pea o mataupu faapenei.

O lē na aafia sa faamālū i se vai taele o le latou nuu i le afiafi po, ae ui ane ai ma lē na molia ma ia faatino ai le gaioiga na molia ai e leoleo.

Faaalia i le faaiuga a le faamasinoga ma faamaumauga a leoleo, e valu masina talu ona tupu le solitulafono ae faatoa taunuu le mataupu i leoleo ma faia ai loa suesuega.

Na ioe lē ua faasalaina i le falepuipui i lana solitulafono, o se itu lelei i le silasila a le faamasinoga ua lē oo atu ai lē na aafia i le faamasinoga e molimau i le gaioiga na faia ia te ia.

Ua faailoa e le faamasinoga lana faaiuga i lenei mataupu a o faagasolo ai polokalame o le 16 aso o le tetee atu i soo se sauaga e aafia ai tina ma tamaitai ma fanau teine a le atunuu.