O tapenaga a lo tatou malo ma le atunuu i le Fono a Malo o le Taupulega i le masina fou, e lē o tagatasi auā o loo aofia uma le lotoifale o le tatou siosiomaga, e lē gata o le faamamā ma faamatagofie aai ma faoāaai i nuu ma afioaga, ae o loo taula’i foi ia galuega faamamā i le faamatagofie o nofoaga tu matafaga.

O loo galulue nei le asosi o pisinisi o loo toe aoina otaota e gaosia mai le uga poo plastics ma ave e toe fausia ai isi oloa, ma le tapenaina o se galuega faamamā o gataifale i matafaga i le aveese o soo se otaota e gaosia mai le uga e pei o fagu pa’u ma pepa iila.

Faaalia i se pepa faalauiloa o lea galuega e faia i le Aso Toonai o le vaiaso nei, o soo se tasi e lagolagoina taumafaiga e faamamā le siosiomaga o le laufanua ma le sami o Samoa mai otaota uga ma isi otaota ina ia saogalemu ma ola mālōlōina o tatou tagata mai ia otaota lafoa’i, e mana’omia le auai i lea galuega.

O nofoaga ua filifilia mo lea galuega o le uafu i Salelologa i Savaii i le nofoaga o loo iai le pisinisi o le Kuki’s by the Harbor, o le hall a le EFKS i Satalo Falealili, ma Si’upapa i le afioaga o Solosolo.

O se tasi lea o sao o le Recycle Samoa o loo tapenaina lenei galuega e lagolago ai i le malo i le faamamāina o le tatou atunuu mo lana taligamalo i le masina fou o Oketopa.