Ua taofia nei e leoleo le oo atu lea i le 820 lita o le ituaiga o fuālaau faasāina ua faatulaga i lalo o le Class B ua ta’ua o le GBL, ina ua tuuina atu e se sui o le mamalu lautele ni faamatalaga ma ni masalosaloga i gaioiga a ē o loo aafia i lenei matāupu.
Faamauina i faamatalaga ma lipoti o lenei matāupu na alia’e mai i Wairarapa i se tasi o nofoaga, o se pusa la’uoloa e teu ai le tele o meatōtino poo se storage facility.
Na faatautaia le galuega a leoleo ma o lea na taofia ai fagupa’u o lea ituaiga fuālaau faasāina o le GBL poo le fantasy e iloa ai e le to’atele i le Aso Gafua poo le 11 i le po.
Ma o lea na o latou māua ai e oo latu lava i le $4.1miliona le tau aofa’i o ia fuālaau faasāina pe a faatau atu i tua poo le street value, ma e faapea e oo atu i le 500,000 vailaau poo doses e ono maua mai nei fagupa’ u GBL.
Lipotia mai le malosi o le sasala o le vailaau i le taimi na faatino ai le sa’iliga, ma o lea na logoina ai e malu o le malo sui o le tineimū ma faalavelave tutupu faafuase’i, o tagata su’esu’e faapitoa e faatino a latou sa’ili’iliga ma o lea na faamaonia ai vaega uma na i totonu o ia fagupa’u lapopo’a.
O se tama’ita’i e 35 tausaga le matua mai Tawa ma se alii e 39 tausaga le matua mai Porirua ua molia nei i le moliaga o le umiaina ma le faamoemoe e tufatufaina atu fuālaau faasāina, o loo taofia nei i la’ua i lalo o le vaavaaiga a leoleo.
