O le vaitau lenei o le seleselega faaiu o le tausaga mo fanau o aoaoina i aoga faataitai, o aoga tulagalua faapea kolisi ma iunivesite i lo tatou atunuu, aemaise o le taualuga foi o aoaoga i totonu o Kolisi Faafaifeau.

O le Kolisi faafaifeau i Malua a le Ekalesia Faapotopotoga Kerisiano Samoa e 34 A’oa’o sa faauuina i le Aso Toonai na tea nei, e aofia ai A’oaó ma o latou faletua ua mae’a le fa tausaga o a’oa’oga i totonu o le kolisi faafaifeau.

O le tausaga nei e 112 le aofaiga atoa o A’oa’o sa aoaoina i le kolisi faafaifeau e aofia ai ma nisi o A’oa’o mai atunuu o le Pasefika e pei o Tuvalu, Kilipati ma Tokelau.

O le lipoti o lenei tausaga faaleaoaoga sa tolaulauina e le Pule o le Kolisi Faafaifeau i Malua le susuga Dr Vaitusi Nofoaiga.

Le Pule o le Kolisi Faafaifeau Rev Dr Vaitusi Nofoaiga.

O le susuga i le A’oa’o o le vasega faaiuaso o lenei tausaga susuga Fiaalii Mafuolo na saunia le lauga faamanuia ma momoli ai le faafetai i vaega uma o le pulega o le ekaleasia, o mātua ma aiga faapea uo ma aumea mamae i le tapuaiga a o alofaiva le Kolisi faafaifeau i ana polokalame faaleaoaoga, aemaise o talosaga ua faaiuina ai ma le manuia galuega o lenei tausaga aemaise le fā tausaga sa aoaoina ai le vasega faaiuaso o le 2023.

Le peresetene o Aoao ma Faletua o le vasega faaiuaso susuga Fiaalii Mafuolo.

O le amataga o le tausaga fou o le a faia ai tautinoga a le vasega fou o le Kolisi Faafaifeau i Malua lea na faalauiloa ia Oketopa i le mae’a o le Aso Sa o le lotu a tamaiti, suafa o i latou ua manuia i le vasega ulufale mo Malua i le tausaga fou 2024.