E 3,000 isi avanoa mo galuega faavaitaimi ua faailoa mai e le malo o le a toe ofoina mai.

O se siitaga tele lea i le talafaasolopito o galuega faavaitaimi ma na sau ai ma nisi o suiga o le a agavaa ai nei tagata galulue.

O i latou nei mai atunuu Pasefika o loo mafai ona malaga mai mo galuega ma mafai ona nonofo i totonu o Niu Sila i le oo atu i le fitu masina ma o lea foi ua sau le tala fiafia o le a agavaa i latou nei i aso ma’i poo sick leave.

A o fiafia ai la atunuu Pasefika lea e aofia ai ma Samoa i le faaopoopo pea o nei avanoa e manuia ai aiga, o se faaiuga ua sau ai a o lē manuia ai lipoti o loo maua mai e faapea e lē o lelei fale o faamautu ai tagata faigaluega iinei atoa ai ma le lē lelei ona vaaia.

Tala a le Stuff e iai tagata faigaluega o loo totogia le silia ma le $100 i le vaiaso agai fale fasimanu i le North Island ae o loo nonofo faatasi ai ma nisi i le campground a le aoga.

I Marlborough, ua iai tagata piki ua mama’i ona o le malulu o potu ae o loo totogi le $150 i le vaiaso.

Ua sau ai ma tala mai le palemia Jacinda Ardern, o le a agai le malo e faaleleia le polokalame o loo aumaia ai tagata galulue faavaitaimi.