E ui sa finau le loia na tulai mo Iosua Muta e tuu avanoa le faamasinoga ina ia toe tapu’e le olaga o lē ua molia e aunoa ma le faasala i le falepuipui, ae o le silasila a le faamasinoga e fai lava si matuia o le solitulafono a Iosua ma e talafeagai le nofo sala i le toese.
O le aso 20 o Tesema 2023 na folasia ai lea faaiuga a le faamasinoga maualuga, ma ua tuli ai nei le faasalaga e 3 tausaga o Iosua Muta o Malie, na faamaonia lona moliaga o le faaoo manu’a tuga.
O se inuga avamalosi na tulai mai ai se vevesi i lē ua nofosala ma se tasi o taulealea o le latou nuu, ma ia umia ai se agaese o se sapelu na ia faaoo ai ni manu’a i lē na aafia.
O ni manu’a na faailoa e le fomai i lana lipoti i le faamasinoga, pe ana loloto e ogaoga ni aafiaga i lē na faamanu’alia.
Na o le lua aso na taofia ai i le maota gasegase i Motootua ae tea i tua.
O Iulai o le tausaga ua mavae na tulai mai ai lenei solitulafono.
