O le atina’e o aiga i Samoa e faamuamua se faamoemoe o matai o tausia se aiga i le faia o galuega e atina’e ai le soifua manuia o suli ma feoi, aemaise e tagi lava i lima soo se fuafuaga ona o le limavaivai ma le lē tagolima, e ui e iai lava ē lima malolosi ma lava le faasoa i le tamaoaiga tau tupe.
E 250 afe tala le tau o le galuega a le aiga sa Maposua i le afioaga o Laulii ua mae’a ma ua umusa i le faamoemoe o le aiga i le afioga Maposua Lealiie’e Rudy Ott o ona alo ma le aiga potopoto, ia faatumau le iai pea o se maota e tua iai le aiga i ana fuafuaga fai i soo se faatasiga ma faalavelave masani.
O le tele o le seleni na faaalu o le toe tanuina o le tulaga maota, ma faafetaia ai e nisi o matai, le afioga Maposua Montini Ott ma Maposua Sulamanaia Tuu’u Pati Auapaau le aao mafola o tauaiga i Niu Sila ma Ausetalia ma Samoa i le faatupeina o le galuega ona o nei aso e le o toe taugofie oloa faufale.
Finagalo faaalia o le afioga Maposua Montini Ott ma Maposua Sulamanaia Tuuu Pati o nisi o matai o le aiga sa Maposua i Laulii. O le umusaina ma le tatala aloaia o le maota talimalo sa auai le afioga i le Sa’o Faapito le afioga Leniu Vainiu Te’o ma le paia maualuga i le afioaga.
