E 24 miliona 700 afe tala le aofaiga atoa o le tufatufaga o le dividend a le NPF, o le a totogi atu i ana aufaisaofaga i le masina fou lea e amata i le aso 10 o Ianuari 2024.

E toe a’e galuega uma a le Malo i le Aso Gafua 8 o Ianuari ma e fetaui lelei ma le maua o lea faamanuiaga, e lē o se nonoga tupe.

Seia vagana ua mae’a le lua masina o le a totogi ai le 2 tesimale 4 pasene ae e lei faaaogāina ona tuusa’o lea o le seleni i le saofaga e avanoa ai ona nonō ai poo le faaputuputu ai seia oo ina aulia tausaga litaea e 55 ona tala lea i tua.

Ua faailoa e le Minisita o Tupe o loo iai ma le vaaia o le faalapotopotoga o le NPF le afioga Lautimuia Uelese Vaai i le feiloaiga ma tusitala, sa iai le fuafuaga e tala i le taimi o faatauga o le Kerisimasi lea faamanuiaga peitai ua tuu atu i le masina amata o le tausaga fou, e fetaui ma tapenaga o le toe a’e o aoga a le fanau, e lē gata e faatau ai togiga a’oga ae o meaa’oga ma pili.