O le augavasega poo le augatupulaga a tamafanau a Gataivai i le tausaga e 1988, o i latou sa fofoa ma faafailele mai o latou olaga aoaoina i totonu o le aoga tulagalua a Gataivai, ua latou faavaeina se latou lava mafutaga e mafai ai ona toe maua se feiloaiga fiafia ma toe talatalanoa i aso ua mavae i mea sa tutupu a o iai i le aoga tulagalua.
Ua tele ina ta’ape le tupulaga i atunuu i fafo ma aumau ai ma faufau ai le ‘ai o le tagata latou, o nisi ua galulue i le galuega a le Atua ae o nisi ua faiaoga, ae o le tāua o lenei faatofāla’iga ua mafai ai ona toe maua le feiloaiga i tagata uma
E ui lava i le vava mamao o nofoaga o loo aumau ai, ae na ta’ua e le susuga i le peresetene ia Peleti Tiomai e ese le lotonuu ma le lotoaiga o le latou augatupulaga, e fai a latou fono ma talanoaga e faaaogā ai le zoom e vaaia lava le faamaopoopo, ma o se lagona fiafia lea ona o le galulue faatasi o tagata uma.
O le tausaga 2020 na amata faavae mai ai le mafutaga i tagata e toavalu ae ua oo mai le tausaga 2021 ua 18 tagata ua auai.
Ua tupu ma ola le mafutaga ma ua iai foi le seleni ua faaputuputu auā ni mea e fai a le mafutaga aemaise ai o se fesoasoani e tuuina atu i le aoga pe a manaomia se fesoasoani faapea ma le nuu.
O le amataga o le tausaga lenei 2024 na faia ai se fiafia tele a lenei tausaga 1988 i totonu o Gataivai e patipatia ai le alofa o le Atua i tama ma teine uma lava o le tausaga 1988 ua atoa ai le latou tai 50 tausaga.
Sa malaga i Samoa i latou o loo aumau i atunuu i fafo faatasi ai ma i latou o loo aumau pea i totonu o Samoa ma le nuu.
O se tausaga fou fiafia i totonu o le nuu auā ua agai uma le tausaga 1988 ma foai meaalofa mo nai tagata matutua o le nuu faatasi ai ma le fiafia tele sa vaalaulia ai faiaoga sa iai lo latou sao i lenei vasega i le aotauina a o laiti.
Na taualuga le faamoemoe o le vasega 1988 i le latou foaia atu loa o le $20,000.00 mo le aoga tulagalua a Gataivai auā fuafuaga amata o le aoga i lenei tausaga 2024.
Laulau o le mafutaga
Peresetene – Peleti Tiomai
Sui Peresetene – Pulotu Faimanifo
Failautusi – Gativai Savili Leota
Teutupe – Mapuilesua Falamoe Tiatia
