Na fautuaina e le Loia Sili le laulau a le Pulega o Tagata Tafafao mai Fafo e tuu atu le 2 vaiaso i le Ofisa Sili o le Pulega o loo faamalōlō lē tumau nei ina ia tali atu ai i tuuaiga o loo tuuaia ai o ia o le amio lē pūlea poo le misconduct. 

I ripoti a le Samoa Observer ua faailoa ai o le amataga o le masina nei sa tāpā ai e le laulau a le STA se finagalo ma se fautuaga mai le Loia Sili e ala i le mataupu o loo faamalōlō ai nei le susuga Faamatuainu Lenata’i Suifua. 

E iai le talitonuga ua fautuaina e le Loia Sili afioga Su’a Hellene Wallwork le laulau ina ia ave iai se 2 vaiaso e tali atu ai i tuuaiga lea na faia e sui e toatolu o le aufaigaluega o le STA. 

E le’i mafai ona tali le Minisita o Pisinisi Faalauaitele le afioga Leatinuu Wayne Sooialo i le mataupu peitai na ia faamaonia le iai o le fautuaga a le Loia Sili ua tuu atu i le Laulau. 

Faailoa e Leatinuu e tatau ona lava papale pea seia ma’ea lelei suesuega ma iloiloga ona faamaea lea o le ripotia aloaia. Ina ua maea ona tuu atu le fautuaga a le Loia Sili o loo ua toe oo atu le mataupu i le laulau a le STA ma tuuina atu le 2 vaiaso i le Ofisa Sili e tali mai ai.