E to’a 21 tagata e aofia ai tamaiti laiti e to’a 18, na lipotia mai le maliliu ina ua osofaia ma tafana e se alii talavou 18 tausaga le matua i se aoga tulagalua (primary school) i Texas i Amerika.

O loo aofia ai ia i latou nei ua maliliu le alii talavou na faia lenei gaioiga mata’utia.
I se lipoti i luga o le NZ Herald o loo ta’ua ai, na muai lipoti mai le to’a 15 ua maliliu, peitai ua toe faaopoopo lena aofaiga seia oo mai le taimi nei.

O le faato’ā toe tulai mai lea o se fasiotigatagata matautia faapenei i se aoga tulagalua i US talu mai le tusa ma le sefulu tausaga talu ai, lea na tafana ai foi e se alii na tamaiti e to’a 20 ma le to’aono tagata matutua i le Sandy Hook Elementary i Newtown, Connecticut.

O lenei faalavelave ua toe tulai mai foi i lenei aso, ae faato’ā 10 aso talu mai foi le isi faalavelave na agai atu ai se alii na faaaupegaina ma fasiotia ai ni tagata uli se to’a 10 sa fai a latou faatauga a o nisi o ni tagata e faigaluega i se supamaketi i Buffalo i Niu Ioka, ma na ta’ua e le leoleo o lena faalavelave sa uunaia i ni uiga faailogalanu.

Mo le faalavelave lenei i Texas, o loo ta’ua mai e ono toe faaopoopo le aofai o tagata maliliu mai nisi o loo tigaina i ni manu’aga ogaoga i le falema’i.

E faapea se lipoti, na ulufale lenei alii talavou i le Robb Elementary School i Uvalde i le aoauli o le Aso Lua (Aso Lulu taimi NZ) ma se handgun, atonu foi ma se rifle, ma amata loa ona tafana solo i nai fanau aoga.

E lei vave ona faailoa mai e leoleo le mafuaaga o le gaioiga a lenei alii, ae na faailoa e le kovana o le aai le suafa o le alii talavou o Salvador Ramos, ma ta’ua ai o se tasi e nofo i le vaipanoa e matuā toatele ai lava tagata Latino e nonofo uma ai, pe tusa ma le 135km i le itu i sisifo o San Antonio.

E iai le masaloga o lenei alii na maliu ina ua fana e ni leoleo na oo atu e tali i le valaau na oo ane ina ua tupu le faalavelave, peitai o loo faia pea su’esu’ega e faamautinoa ai lena mea.

O se tasi o lipoti na oo ane i leoleo, e faapea na muamua fana e lenei alii o Ramos lona grandmother, a o lei ulufale i totonu o le aoga ma amata loa ona tafana solo tamaiti aoga. E lē o mautinoa mai i le taimi nei le tulaga o le grandmother o lea alii lea na ia fanaina.