O loo faagasolo i le faamasinoga sili i Mulinuu le su’esu’eina o molimau e sefuluvalu a leoleo e lagolago ai le tetee a ni alii talavou se to’afā o loo molia faatasi i le solitulafono o le fasioti tagata faamoemoeina.

O Fepuari o le tausaga e 2018 na lipotia ai i leoleo le maliu o se tama tane o le nuu o Faleasi’u na faaoolima iai i latou e to’afā ua molia. Faaalia e le loia a leoleo i lana folasaga i luma o se laulau a faatonu ma le afioga i le tamaitai faamasino le afioga Tafaoimalo Leilani Tuala Warren, o le taaloga volipolo na faia i le lotoā a le ekalesia a Iesu Keriso o le Au Paia o Aso e Gata ai i le pitonuu o Sapulu i Faleasiu na auai i latou e to’afā ua tuua’ia ma lē ua maliu.

E iai le faaletonu i le mitiafu o lē ua maliu na ia laeiina i totonu o le lotoā a le ekalesia ma fautuaina ai e se tasi o le to’afā ua molia e lē faatagaina i tulafono a le lotu peitai sa lē talia le fautuaga. O lē foi ua maliu sa faasua’avā. Na tulai mai ai loa se feseesea’iga ma se finauga na iu i se vevesi ma faaoolima ai i latou ua aafia i lē ua maliu.

O le moliaga faaleoleo a le itu tagi o le fasioti tagata pa’ivalea ae o le moliaga autu o le faaoo o le maliu i se gaioiga solitulafono na faia ma le loto iai.