Ua lipotia mai nei le faasalaina e le faamasinoga o se kamupani, ae o se pisinisi i Paeroa i se sala tupe e oo atu i le $159,250 ina ua ioe e lē e onaina lea pisinisi, ona moliaga i lona faileagaina o ana tagata faigaluega mai fafo poo migrant workers.
E lē gata i lea, ae ua faasala foi i lona tuuina atu o ni faamaumauga taufaasesē ma le lē moni i le ofisa o femalagaa’iga a Niu Sila, le Immigration New Zealand (INZ).
Ua faamauina i se faasalalauga a le pulega o femalagaa’iga na ta’ua ai le faatonuina e le faamasinoga o le totogi atu ai foi e le kamupani o le Dev Trading Limited (DTL) e pei ona alu i lalo o le Super Clearance le $18,684.72, o se sala tupe e totogi ai gaioiga lē lelei (reparation) ma le ta’i $5,000 mo tagata ta’itasi na aafia i nei soligatulafono.
I sa’ili’iliga ma su’esu’ega a le pulega o le leipa – o tagata faigaluega, na o latou māua ai le oo atu i le $158,000 le aofa’iga o totogi ma penefiti a ē ua aafia na taofiofi e le kamupani, e le’i totogiina atu i nai nei tagata faigaluega.
Ta’ua o i la’ua ua aafia o ni tagatānuu Initia, na aumai i lalo o le visa ua faaigoaina o le Accredited Employer Work Visa, ma na māua le faafaigaluega ai o i la’ua nei mo le 14 o itula i le aso, mo le 7 aso e aofia ai aso mālōlō ma aso faamanatu e aunoa ma le maua o totogi sa’o ma lē maua ai ni aso mālōlō e tatau ai i lalo o le tulafono.
Ta’ua na maua e le ‘ausu’esu’e ni faamaumauga taufaasesē – e ala i le fafau o taimi o galuega a ia tagata (fabricated rosters), o faamaumauga o totogi ma ta’iala ma aiaiga o le galuega ua tuufaatasia e lea pisinisi na faia e faasesēina ai le pulega o femalagaa’iga, false payslips and employment modules.
O gaioiga ua taumafai ina ia aua ne’i silafia e nei tagata a la aiā faaletulafono i le galulue ai i totonu o Niu Sila.
Ua faaalia e le faatonu o le Ministry of Business, Innovation and Employment o Jason Perry, e matuā lē talia e Niu Sila nei gaioiga, ma o le a taumafai malosi e taofi nei soligatulafono ua aafia ai le to’atele o nai tagata e malaga mai fafo o loo iai le naunauta’iga e sa’ili manuia mai i Aotearoa.
Puna o Faamatalaga: https://www.immigration.govt.nz/about-us/news-centre/paeroa-employer-hit-with-nzd-159250-fine-for-exploiting-migrant-workers/
