Ua faaopoopo isi falepalota na sese ona faamaumau palota e le ofisa o faigāpalota, ma ua faatalosagaina le tatau ona faia o se iloiloga tutoatasi.

E 15 falepalota lea ua faailoa mai na sese ona faamaumau palota, ese ai le isi pusa atoa o pepa palota mai le East Coast e lei faitauina i le faitauga aloaia o palota.

Talu mai le po o le Aso Lua na faailoa faalauaitele mai ai i tua ua maua palota na faia mo pati na sese ona faamaumau, o lea na toe suesue ai ma o ananafi na toe faailoa mai ai i tua le faaiuga aloaia ua uma ona toe teuteu e le komisi o faigāpalota.

O siaki na toe faia e aofia ai pati, o itumalo faapalota faapea ai ma palota faapitoa ma e ui i nei faasa’oga na toe fai, e lē o iai se suiga i le aotelega o le iuga o le faigapalota a le atunuu, e lē gata o sui tauva ae faapea le faatulagana o nofoa o loo nofoia e faafaletui taitasi.

E ese mai la i palota mo pati na sese ona faamaumau i lalo o isi pati, o lea na maua ai ma le pusa palota a le itumalo o East Coast na iai i totonu le 620 palota, ma o palota nei na tauaofai i le faitauga lē aloaia, ae misi i le faitauga faalua.

Ua faatoese ai ma le ofisa o faigāpalota i le sasi o le aufaigaluega, ma e lē o suia lava la latou mau e lei iai nisi faiga faaalatua na uia i taimi na faitau ai palota.