E 120 a’oga i lo tatou atunuu o le a faapipii ai satelite e maua ai fesoota’iga televavave tau initaneti, ma le fuafuaga a le kamupani o le Blue Wave o le a lē toe tuta’ia ai le maua o ia fesoota’iga faaonapo nei, mo le maua ai o mataupu ma faamatalaga tāua mo le a’oa’oina o fanau a le atunuu.
Ua faailoa lea fuafuaga e le pule o le kamupani o le Blue Wave le susuga Togisala Tony Leota, i le mae’a ona faapipii ma faaola ulua’i fesoota’iga initaneti wifi, e maua i le malosi o fesoota’iga satelite i le motu i Savaii lea ua maua e le a’oga tulagalua a Sasina, o le kolisi o le itu Asau, le a’oga tulagalua i le afioaga o Auala, ma le a’oga tulagalua i Salelologa. Ua faaalia e le alii pule i se pepa o faamatalaga, ua taunuu se miti a le kamupani ua tolu tausaga o taumafai mai, lea na amata i le taimi o le pipisi o le faama’i misela seia oo ina sau le faama’i Koviti-19 peitai na iai le to’a i le tausaga na te’a nei ona o se faai’uga a le faigamalo talu ai.
Ua faaalia foi e Togisala Tony Leota e ui ina iai ni manatu e faasala ese ai i le faaauauina o le galuega o le faaoo atu o fesoota’iga initaneti mai satelite i a’oga, ae o le itu sili ona tāua o lea ua mafai ona faaoo atu i a’oga i le atunuu. Ua ta’utino foi le alii pule o le Blue Wave, e leai se popolega poo ni atugaluga i le maua e fanau o isi faamatalaga e lē tatau ona latou maua ona ua mae’a tapena lelei le kamupani mo le taofia uma o ia ituaiga o faamatalaga mai le maua e fanau. O le 120 o a’oga o le a faatutū ai satelite e lē gata o le motu o Savaii ae faapea i Upolu, o Manono ma Apolima.
