O le polokalame fesoasoani e tauala mai i le Faletupe a le Lalolagi ma le Pulega o Felauaiga i le Laueleele e maua fua ai laisene a tina ma tamaitai o loo manaomia.
O i latou e 113 sa aotauina ma uia auala e faatino ai le faiga o le laisene avetaavale.
E mae’a le 3 masina o nei aoaoga e 98 i latou i Upolu ma le 14 mai le motu tele i Salafai.
Ua afua lenei polokalame ona na faaalia e le Ofisa Sili o Pulega, Galuemalemana Taatialeoitiiti Tutuvanu-Schwalger e na o le 25 pasene o laisene o loo umia e tina ma tamaitai.
O le ala lea na silasila ai le Pulega i se auala e siitia ai le fuainumera o tina ma tamaitai e umia laisene taavale.
O mafuaaga foi na folasia e tina ma tamaitai e manaomia ai le umia o o latou laisene avetaavale ina ia mafai ona ave pea e latou a latou taavale e fesoasoani ai i tamā i le pikiina o fanau mai aoaoga o faiga faatau ma nisi.
O le isi mafuaaga o sauaga i totonu o aiga ina ia mafai ona sola ese mai pea iai ni fevesiaiga i va o ulugalii.
O lenei polokalame ua mafai ai foi ona fetuutuunai le faatinoina o auaunaga a le Pulega o Felauaiga i le Laueleele i le itu tau laisene.
