O se vaalele o le fitafita o le malo o Niu Sila na malaga mai i le Aso Tofi o le vaiaso nei, le aumalaga e 113 o alii ma tamaitai leoleo o lea malo tuaoi, o se uō ma se pā’aga totino a Samoa, e fesoasoani i galuega o le puipuiga o le Fono a Malo o le Taupulega.
O nisi o leoleo sinia o le matagaluega o leoleo, falepuipui ma le toe fuata’ina na faatalia le taunuu mai o lea aumalaga o leoleo mai Aotearoa, ua faaopoopoina ai le numela o leoleo mai atunuu o le Pasefika ua taunuu auā lava galuega o le puipuiga ma leoleoina o le saogalemu o lea fono tele faavaomalo.
O le Aso Lulu o le vaiaso nei na faia ai se sauniga i le kolisi o a’oa’oga faaleoleo i Tafaigata, sa saunoa ai le Minisita o le matagaluega e faafeiloai vasega o leoleo o le Pasefika na muamua taunuu mai.
O le taimi atoa o le fono o le a faamautū ai i Samoa leoleo mai Niu Sila ma leoleo o isi malo tuaoi o le Pasefika.
Ua faaopoopo i le lagolago a le malo o Niu Sila e ala mai i leoleo, le fesoasoani o taavale avema’i poo ambulance mo galuega lavea’i i ni faalavelave faafuase’i e tutupu i le taimi o le Fono a Malo o le Taupulega.
O ia taavale avema’i na aumaia e le vaa o le fitafita a Niu Sila le Canterbury lea na taunuu i le ogatotonu o le vaiaso nei.
O le a fesoasoani foi lea vaa o le fitafita o le sami a Niu Sila i le leoina o ogasami uma o le atunuu a o faagasolo le fonotaga.
