E $10,500 le sala tupe ua tuuina atu nei i se aufaifaiva e toalima ina ua maua ua latou fagotaina ni i’a e 348 i le aso e tasi i Haurakai Gulf.
O le masina o Me i le tausaga e 2022 na maua ai e sui o le faigafaiva ni alii fagogota se toalima o latou fagotaina snapper e 317, ua ova atu ma le iva taimi ua sili atu ai lenei aofai nai lo le aofiga e tatau ona maua i le aso e tasi, e taifitu i’a a le tagata e toatasi.
Ta’ua e le pule o le MPI o le faigafaiva ia Andre Espinoza, e 95 tama’i snapper na maua ma e lē fetaui size o nei i’a na maua.
O nisi o i’a sa mauaina, e iai kahawai e 19, 2 John Dory, 2 gurnard, 6 jack mackerel, 1 kingfish ma le 1 le blue mackerel.
O i latou nei e toalima o Tai Ah You 46 tausaga le matua, Laupagigi Tupu Siliva e 69, Lameta Kasiano e 49, Metai Fialelei Lotoa e 58, ma Avia Amosa e 55.
Ma sa ioeina e i latou nei moliaga i lalo o le tulafono o faigafaiva i le Faamasinoga Faaitumalo i Manukau i le aso ananafi.
O le taitai ia Tai Ah You na faasala i le $2,500.00 ae o le isi toafā o i latou na tuuina atu iai le sala tupe e $2,000 a le tagata e toatasi.
O le latou vaa, taavale toso ma le tele o latou meafagota na aveesea uma ma ua poloaina ai foi ma le susuga ia Tai Ah You e tatau ona totogi le tino i tupe e $5,248 a o lei oo le faaiuga o Novema.
Na maua e tagata o le ofisa o faigafaiva le matuā ova o le tele o i’a ina ua latou asiasia le vaa i le vaega e toso ai vaa agai i le sami.
O lea asiasiga na iloa ai o loo iai ni chilly bins lapopoa se fitu ua tutumu i i’a.
O le toalua o nisi o nei alii e toalima sa la iloa lelei le lapopoa o i’a e tatau ona fagotaina faapea le aofai faatapulaa o snapper e tatau ona fagotaina i le aso.
Ma sa maua foi le fua e fua ai i’a i luga o le vaa.
Ta’ua e Espinoza o tulafono o faigafaiva e puipuia ai puna’oa o fagotaga mo tagata uma.
Afai ae mulimulitai i tulafono o le a mafai ona e alo ese mai ai ma sala tetele ae faaauau ai pea au faigafaiva.
O loo faamalosia e le Fisheries NZ tagata e ala mai i ana polokalame e leai se totogi o faafaigafaiva e iloa ai tulafono ma ia lipotia mai gaioiga faasolitulafono i le telefoni o le 0800 4 POACHER (0800 47 62 24).
