O loo iai nei popolega ina nei avea le mataupu o loo faavesivesi ai uafu i le atunuu ma le kamupani tosovaa aupito tele i Ausetalia, e ono aafia atu ai ma uta ma afifi a tagata e lafo mo le Kirisimasi.
O le kamupani a le Svitzer o loo faaauau pea le la mataupu ma le iuni o tagata faigaluega ona o tulaga o maliega tau galuega.
Fai mai le Svitzer o le a loka faitotoa o le kamupani i le tusa ma le 600 o tagata faigaluega amata i le aoauli o le Aso Faraile nei ina ua mae’a le 3 tausaga o faatalanoaga i mataupu sa laga ae lei maua lava se maliega tonu.
Sa faia talanoaga a le kamupani lea ma le Iuni faapea le minisita o felauaiga, David Ellioti i le Aso Lua e taumafai ai se tali o le mataupu peitai e lei manuia.
Fai mai le minisita o sootaga tau galuega, Tony Burke e le na o tagata e faigaluega i le kamupani o le a aofia ai, o le a aafia foi tagata faigaluega i uafu, aveloli, i latou o loo faigaluega i warehouses aemaise foi le aufaatau.
