Ua vavevave tele Rob Campbell ma ana saunoaga i le faitau selau o tagata vaea a le Te Whatu Ora.
O le mae’a tuli ai o Rob Campbell mai ana galuega e lua o faatonusili o le Te Whatu Ora ma le Environmental Protection Authority i le vaiaso ua alu, na ia toe faasalalauina ai loa i luga o le social media e le o toe mamao leai ni galuega a nisi o loo galulue i totonu o le soifua maloloina.
Fai mai Campbell o mea nei sa le mafai ona talanoa ai ona o le nofoa na ia nofoia, peitai o lea e le o toe iai o lona uiga ua mafai.
O tuuaiga foi a Campbell ua ia tuuaia ai o loo tele naua punaoa ma’umau ona o le suiga na suia mai ai pulega mai district health boards tuai poo DHBs i lalo o le pulega ua iai nei a le Te Whatu Ora, ma o nisi o avanoa faigaluega ua taitoalua tagata e faia.
E lei faigofie i le iuni o loo tu mo tagata faigaluega a le malo le Public Service Association saunoaga nei, ma ua fai mai ai le iuni e le o fesoasoani saunoaga a Campbell i lenei mataupu.
Mai le failautusi o le iuni Kerry Davies, o le alu o le vaea e le o se mea e mafai ona taofia, peitai e le o iai ni fesootaiga e mautinoa ai se fuainumera o galuega vaea i le taimi nei.
