O le filifiliga a le faigamalo fou a le Malo o Amerika e avea le alii o Robert F Kennedy Junior ma faauluuluga o le soifua mālōlōina a lea malo mauoloa ma malosi i le lalolagi, ua vavalo ai ma le Faatonu Sili o le soifua mālōlōina i Samoa i le ono iai o ni aafiaga ogaoga i le soifua mālōlōina lautele o le tatou atunuu poo le public health.
Ua faaalia e le faatonu sili aoao o le soifua mālōlōina le susuga Aiono Dr Alec Ekeroma i se auala o fesoota’iga i Uosigitone i Amerika e ta’ua o le Democracy now, o Robert F Kennedy Junior sa ia faasalalau lona matuā tetee i le faaaogāina o vailaau mo tuipuipui i le taimi na pipisi ai le faama’i misela i Samoa a o maualalo ai le pasene o fanauiti a le atunuu sa fai o latou tuipuipui.
O lea faama’i e pei ona silafia na fano ai le ola o tagata e 83 i lo tatou atunuu ma e to’atele i fanauiti.
Faaalia e Aiono afai e teena e le faauluuluga o le soifua mālōlōina a lea malo tele le aogā o vailaau o tui mo le puipuia o le ola o tagata mai faama’i, e lē taumate o le a aafia tele ai le tulaga o le maua e Samoa o vailaau mo tui e puipuia ai le soifua o tagata mai faama’i eseese.
Ua faaopoopo lea filifiliga a le Pelesetene o Trump i se tasi o ana faiga faavae fou ua aveesea ai le lagolago a lona malo mai le Faalapotopotoga o le Soifua Mālōlōina o le Lalolagi o loo avea ai Samoa ma ona sui auai.
O se faalapotopotoga o loo maua ai e lo tatou atunuu fesoasoani tau vailaau ma fuālaau ma isi auaunaga tāua mo le togafitia o faama’i eseese.
Sa avea Robert F Kennedy Junior ma lona faletua o se tasi o malo valaaulia i le faamanatuina o le Tuto’atasi o Samoa i le masina o Iuni o le tausaga e 2019.
O le tausaga tonu lea na pepesi ai le faama’i misela i Samoa.
