I le aso muamua o Aokuso na amata ai le galuega a le ofisa o le komisi o faigapalota o le lesitalaina o tagata palota mo itumalo e tolu o le a toe faia a latou filifiliga mo ni o latou sui usufono i le paeaiga lona 17 a le Palemene, ua iai le talitonuga e iai se faaopoopoga o le numera o tagata palota mo Vaa o Fonoti, Faleata 4, ma Siumu pe a mae’a lea galuega i le Aso Faraile o le vaiaso fou le aso 18 o Aokuso.
E fua se numera o le a faaopoopo i le aofaiga o tagata palota o ia itumalo sa faamauina ma faaaogā i le palota tele a le atunuu na faia ia Aperila o le tausaga e 2021.
O loo faamauina ai i le lola a le itumalo o Siumu e 2,191, Vaa o Fonoti e 1,672, ma Faleata 4, e 2,171.
I tapenaga a vaega faaupufai e lua le Faatuatua i le Atua Samoa ua Tasi ma le vaega e puipuia aiātatau a tagata, ua mautu sui faatutū mo le itu faaupufai ua avea nei ma faigamalo, ae o le Itu Agai e lei faailoaina lautele ni o latou sui.
Ua na o le itumalo o Vaa o Fonoti ua faailoa e se molimau faatuatuaina ua mautinoa o le a tauva mai ai mo le vaega e puipuia aiātatau a tagata le tofa Leausa Take Naseri, sa avea ma Faatonu Sili aoao o le soifua maloloina mo ni tausaga.
O le a faamautu lelei ni sui o le a tauva mo le vaega e puipuia aiātatau a tagata pe a faailoa lautele se finagalo o le taitai i se taimi a o lumanai le faailoa ai e le ofisa o le komisi o faigapalota o aso e faaulu ma tapunia ai le toe faaui i tua o suafa o ni sui tauva.
