O le valaaulia mai le Malo e pei ona faaleo ai e le afioga i le Minisita o Faatoaga ma Faigafaiva, le Afioga Laaulialemalietoa Leuatea Polataivao Fossie Schimidt i sana faatalanoaga i luga o se tasi o alaata faasalalau.

O lenei valaauliaua tālo atu ai i alo uma ma tamafanau a Samoa i soo se tafa o le kelope, o i latou na amata fofoaina mai taleni pese ua iloga ai Samoa i le lalolagi i ana musika ma faafiafiaga, ina ia toe foi atu i le atunuu pele se’i toe faafiafia tasi i le tapunia aloaia poo le taualugaina o le faamanatuga o le 60 tausaga o le Malo Tutoatasi o Samoa, ae se’i maimoa ma molimauina e alo ma fanau o lenei talutalufou, o le toatele o i latou sa lei fananau mai i le vaitaimi na pepese ai nei tamafanau a Samoa, ae atonu e na o igoa ua faalogo i ai, ma faalogologo ia latou fatuga, ae o se avanoa lelei lea o le a vaaitino ai i nei tagata pepese lauiloa a Samoa.

Na saunoa Laauli a o momoli lana valaaulia, e leai se mea e popole ai i le itu tau sound system, lighting system, o mea na o le a tapena uma mai e le Malo, ae afai e iai lo latou agaga e toe fia asia laufanua o le atunuu sa pepese ma faamemelo i ai, e totogi atu lava e le tagata lona pasese ma le nofoaga e faamautu ai, ma fai ai sona sao i lea faafiafiaga tele ua tapena.

E tele igoa o aufaipese iloga a Samoa sa ta’ua uma i le saunoaga a le alii minisita, e iai le Punialavaa, Tiamaa, Heavy Tama, Maatulua, Penina o Tiafau, Matagi mai Sasa’e, Tolumaanave Misiluki Su’a, Ilalio Tuanai, Jerome Grey, Faifai Easy, Rosa Pa’epa’e, Dave Parker, Aneseto Falemoe, Faaeteete Manu, Richard Parker, Felise Mikaele, La Goto, La Oso, Taulaga Tagaloa, Tipaula.

Na pa’i foi le saunoaga a le Minisita i nisi o alo o Samoa o loo ta’uta’ua ia latou taleni pese i atunuu i fafo o loo aumau ai e pei o le Sole Mio, Adezze ma isi tamafanau a Samoa ua lei afea i le lisi a le Minisita, ae na saunoa Laauli, ne’i misi i lana faalau ae o lana tatalo ina ia afifio atu i Samoa soo se alo lava o le atunuu sa iai pe o loo iai pea lea taleni o le pese, tusi pese, pe fatu pese, ina ia afifio atu se’i fai sa latou faaaliga tele e faamae’a aloaia ai le faamanatuga sa faatino mai mo le tausaga atoa, o le 60 tausaga talu ona sisi le fu’a o le Malo tutoatasi o Samoa.

Na faailoa e Laauli, e mafai ona faafesootai atu o ia i lana imeli laauli@lesamoa.net e soo se tasi o loo fia auai atu i lenei faaaliga tele o alo pepese uma ma le aufaimusika a Samoa.