Ua iai ni valaau ia faia se suiga i le tulafono mo foa’i faapolokiki i le mae’a ai o le fofogaina o se tasi o mataupu e faatatau i le tulaga lea i le faamasinoga.
O lipot a le Newshub i le asō ua ta’ua ai le una’ia o le malo ina ia tapunia vave loa se avanoa o loo matala pea i lalo o tulafono o foa’i faapolokiki, fai mai i latou e popoto i le tulafono o i lea e faaaogā mai ai le atunuu e nisi mai fafo. Ua ta’ua i le lipoti o le tulaga faapea na aliae i le faamasinoga i le vaiaso talu ai ina ua faasaoloto e le faamasinoga maualuga alii e to’alua sa tuua’ia i le lē lelei o le faafoeina o se vaegatupe e toeititi 750 afe tala Niu Sila, o se tupe na tuuina i le NZ First Foundation.
Ua afua ai le valaau a nisi ina ia faia loa se fetuuna’iga i le mataupu lea a o le’i oo mai le palota o le tausaga fou. E ui la e pei ona ta’ua i le lipoti e le’i iai ni faamaoniga o ni faiga faasolitulafono na aofia ai i foa’i mai fafo mo le NZ First Foundation ae fai mai i latou o loo valaau mo se suiga, e ma’ale’ale le mataupu lea ma e ao lava ona silasila iai mo se faapupulaga atili ma manino a o le’i oo mai le isi palota faapolokiki.
