O le popole o se tasi tamā i lona toalua ma lana fanau teine ua afua ai ona ia valaau i le matagaluega o aoga i Ausetalia i Saute ina ia fesoasoani ane i le mataupu na tulituliloa ai lona toalua ma lana fanau teine e toatolu e se kegi o teine aoga i le taulaga faatau i Adelaide.
Fai mai lipoti a le Alaata 9 o le kulupu lea o teine aoga na o latou tuli solo le teineititi o Addison Rice mai le Tausaga 9 ma ona uso e toalua ma lo latou tina i Mount Barker Central.
Fai mai na tuli agai i totonu o le faleoloa o le Specsavers lea na fesoasoani ane iai le aufaigaluega ma taloka faitotoa.
O le mau a le tamā o le teineititi e pei ona lipotia ua matuā lagona le mafatia o lona toalua ma si ana fanau aemaise sa tauvalaau atu faamata’u i lana fanau.
Fai mai le tamā lea o molimau i le mataupu lea na o latou ta’ua ua agai ese ai ma nai isi tagata faatau matutua sa iai ina ua vaaia le lē saogalemu i le taimi lea a o tau vaovao atu le kulupu lea i le fafine ma lana fanau.
Faailoa e le tamā ma lona toalua ua alagatatau i le matagaluega o aoga ona fai se gaioiga i lenei mataupu ae faapea foi ma leoleo.
Fai mai o leoleo na tutuliesea le kulupu lea ae lei iai se isi gaioiga na faia iai.
Ua faailoa i le lipoti se tusi a le aoga ua tuuina atu i mātua o le a gaioi le aoga i sana faaiuga i le mataupu lea pe a mae’a faamautu uma ane faamatalaga o le mea na tupu.
